Тең мүмкіндіктер философиясы: Қазақстанның инклюзивті жоғары білім беру контекстіндегі көмекші технологиялар

Аннотация

Жоғары білім берудің цифрлық трансформациясы жағдайында көмекші технологиялар инклюзивтілікті қамтамасыз етудің және тең мүмкіндіктер қағидаттарын іске асырудың маңызды құралына айналуда. Бұл мақала КТ-ны философиялық-антропологиялық тұрғыдан қарастырып, олардың ерекше білім беру қажеттіліктері бар студенттер үшін қолжетімді білім беру ортасын қалыптастырудағы рөлін талдайды. Зерттеуде сауалнама, салыстырмалы талдау, құжаттардың мазмұндық талдауы және жалпы логикалық әдістер қолданылды.

Зерттеу нәтижелері Қазақстандағы инклюзивті жоғары білімге көмекші технологияларды енгізудегі негізгі кедергілерді анықтады. Оқытушылар арасында КТ туралы орташа деңгейдегі хабардарлық болғанымен, олардың іс жүзіндегі қолданылуы шектеулі болып отыр. КТ-ны оқу үдерісінде қолдануға кедергі келтіретін негізгі факторлар: оқытушыларға арналған арнайы даярлықтың жеткіліксіздігі, технологиялардың қолданыстағы IT-инфрақұрылымымен үйлесімсіздігі және қажетті бағдарламалық қамтамасыз етуге шектеулі қолжетімділік.

Бұл зерттеудің мақсаты – Қазақстандағы инклюзивті жоғары білім беру контекстінде тең мүмкіндіктер философиясын іске асырудағы КТ-ның рөлін талдау, қазақстандық жоғары оқу орындарында ерекше білім беру қажеттіліктері бар студенттер үшін қолданылатын КТ-ны анықтау, сондай-ақ оқытушылардың КТ-ны инклюзивті білім беруде пайдалану тиімділігі туралы қабылдауын зерттеу.

Түйін сөздер: тең мүмкіндіктер философиясы, инклюзивті жоғары білім беру, көмекші технологиялар, интеграция, тұрақтылық