Қазақстанда жергілікті өзін-өзі басқарудың өзекті мәселелері: әдеби шолу

Аннотация

Жергілікті өзін-өзі басқаруды дамыту азаматтардың жергілікті мәселелерді шешуге қатысуын қамтамасыз ету, азаматтық белсенділікті арттыру, саяси жүйедегі демократиялық басқаруды дамыту, азаматтардың мемлекеттік шешім қабылдау процесі туралы білімдерін кеңейту сияқты қажеттіліктермен дәйектеледі. Қазақстанда соңғы жылдары жергілікті өзін-өзі басқару жүйесін күшейтуге бағытталған төртінші деңгейлі бюджетті енгізу, ауыл әкімдерін тұрғындардың тікелей сайлауына мүмкіндік беру сияқты бірнеше маңызды шешімдер қабылданды. Қабылданған шешімдер өз кезегінде осы бағыттағы мемлекеттік саясаттың, жасалған өзгерістердің тиімділігін зерттеуге бағытталған академиялық жарияланымдар санын арттырды. Бұл зерттеу осы тақырып бойынша жарияланған ғылыми жарияланымдарды зерделеу мақсатында жүргізілді. Авторлар әдеби шолу әдісін қолдану жолымен соңғы жылдары осы тақырып бойынша жарияланған ғылыми жарияланымдарды топтастырып, оларда жазылған негізгі нәтижелер мен тұжырымдарды шығарды. Жиналған ақпараттардағы негізгі тұжырымдар мен қорытындыларды синтездеу нәтижесінде жергілікті өзін-өзі басқару жүйесін әрі қарай дамыту үшін қажетті компоненттер мен назар аударылуы керек кемшіліктер анықталды. Зерттеу нәтижесінде күшті жергілікті өзін-өзі басқару жүйесін қалыптастырудың өзекті мәселелері анықталып, осы саладағы мемлекеттік шешім қабылдаушылардың қарауына және зерттеушілер мен сарапшылардың талқылауына арналған тұжырымдар әзірленді.

Түйін сөздер: жергілікті өзін-өзі басқару, жергілікті басқару, ауыл әкімі