«ҚАЗАҚ ЕЛІ – ЕКІ МЫҢ ОТЫЗ»

Аннотация

Қазақ елі Еуропаның төріне шықты. Бұл ел тарихының алтын әріппен жазылатын беттері. Үш континенттің елу бес елі бас қосып, әлемдік деңгейдегі проблемаларды талқылағанда, ортақ сөз айту құқына ие болу – биік жауапкершілік, еліміздің айшықты шағы. Бұл ұжымның әрбір мүше-елдері кезектесе келе, төрағалыққа елу бес жылдан кейін ғана қолдары жетеді екен. Бұл көп істің мән-жайын ашып тұрған жағдай. Сондықтан ЕҚЫҰ-ға (бұдан әріде Ұйым деп аталады) Қазақ елінің төрағалығы әрбір азаматтың көкірегін керетін қуаныш болуы да табиғи жағдай болса керек. Әрине, мұндай жауапкершілік аспаннан түскен жоқ, ол егемен елдің он тоғыз жылдық ісі мен тәжірибесінің, қазақ халқының, онымен тағдырлас өзге этнос өкілдерінің сабырлылығы мен төзімділігінің, хакім Абай айтқан заманды билей алатын кемел көшбасшысы болғандығының арқасында орындалып отырған тарихи жағдай.