ҰЛТТЫҚ РУХТЫҢ ҚАЗАҚТАНЫМДЫҚ ТӘЛІМІ

Аннотация

Қазақтанудың негізгі мәселелері – бірін­шіден, қазақ болу, қазақтыққа жарау және қазақты құрметтеу, қазақты тану және қазақты таныту дәстүрін қалыптастыру, екін­шіден, қазақ халқының рухани-мәдени дәстүрі мен құндылықтарын үйлестіру және сақтау, үшіншіден, өз еліміздің патриоты бола отырып әлемдік білім, информация және мәдениет кеңістігіне шығаратын, өркениеттік сұранысқа лайықты бәсекеге қабілетті болу. Қазақтыққа жолдың әрқайсысы нақты және ауқымды екені көрініп тұр. Басты мақсат – бүгінге өркениетке лайықты қазақтыққа жарау және қазақпен бірге жаратылып, қазақпен бірге қалыптасып келе жатқан қасиеттер мен рухани мұрамызды бір арнаға тоғыстыру әрі жинақтау. Мақсаттың астарында – ұлт бірлестігін, оның рухани тұтастығын жаңғырту қамқорлығы басым. Иә, Қазақстан халқының рухани дамуына ұйытқы болатын осындай идеялық және теориялық-әдістемелі негіз керек.